Glenn Wasicuna

Wambdi Wapaha

Glenn Murray Wasicuna

Dakota wicahca ka hihnaku ka unkanna ka wounspekiya heca. Wicota ka Dakota oyanke ota owicakiye. Dakota iapi kin wakan he okahnige ka Dakota Wicohan hduha mani.

Wambdi Wapaha Wipazoka Wakpa, MB, CAN ed ehanki ka icage. Wazusteca sa wi izaptan 1950 ehanki. Hunkuku kin Cora Ross ka Phillip Wasicuna ewicakiyapi. Hunkuku kin nina tewicahinde. Hekta 1984 heehan wounspewakantuye i hdustan ka Journalism wayawa unspe. Owa ka yawa tehinde ka wicazo waste wan nina wastedake ce'e. 

Waniyetu ota Journalist heca ka 1998 heehan Dakota iapi kin wounspewicakiye htani un. Dakota iapi kin Sakpe ka Tinta Wita ka Gustavus Adolphus College ka Sisitunwan Wahpetunwan Wounspe Wakantuye ka Tiospa Zina Tribal School ka Minnesota State University, Mankato ka Cansayapi Owayawa Tipi Ed wounspewicakiye. Wounspekuwa ota wicayuhe. Wanna wounspekuwa tawa ota Dakota iapi kin wohdakapi ka wanna wicota Dakota iapi kin wohdakapi cinpi ecines wounspekiya waste. Wanna Wicota Dakota wicohan kin hduha manipi ecines wounspewicakiyapi.

Ka nakun wicohan ota ecun. Tatanka kin hena Mahkato ed awicahdipi okiye. Nakun Mni Sota Makoce Land of the Dakota owa okiye. Ka Nakun Dakota wowapi 1838-1878 hehanyan yuiyeska. Dakota iapi owayawa Voices of Our Ancestors owayawa Sisitunwan (2017) ka Sakpe (2000) Ed kage okiye. Ka Dakota iapi wounspekiya wicohan wan kage.

Tawicu ye Gwen Westerman Wasicuna eciyapi ka cinksi num ye Peter Merrick ka Travis Griffin ewicakiyapi ka cunksi ye Isnana Nazin Win Erin Griffin eciyapi ka cinye kin ye Wanbdi Wakita Bob Wasicuna ka takoza num ka tuzan ota ka tuska ota yankapi canteyuhapi.

Hoksicekpa iyamni 2025 Maka To etanhan nagi iyaye ka wanna ake hunkake Phillip ka Cora Wasicunna ewicakiyapi ka Tanke yamni ye Grace ka Betty ka Mary ewicakiyapi ka cinye num ye Tim Wasicuna ka Ray Wasicunna ewicakiyapi ka cunksi wan ka takoza yamni ye Mato Sicu ka Canwahpe Kasna ka Wakinyan Ahdi ewicakiyapi wanwicayanke.

Taku ota unspeunkiyapi. Dakota Wicahca heca ka Woinina ka Dakota Wicohan kin okahnige. 

Dena wicoie ohinni kin eye, "Cancan sni. Iyokpi do. Ka heca taku wakan t'a okihi sni. Heca Dakota Oyate kin Dakota Makoce kin ataya wounhdakapi kte. Ohinni Dakota ia po!" ce'e.

 A Wake will be held starting at 7pm Tuesday, May 6, 2025 at Glenn and Gwen's home.  A Service for Glenn will be held beginning at 10am Wednesday May 7, 2025.  Bring chairs and wateca dishes.  

Wozu Otina ed

14961 550th Ave Good Thunder, MN

Anpetu Itnvnpa 7 ape

ka

Anpetu Iyamni 10 ape